Letra Quanno mammeta nun ce sta Canzoni Napoletane

Quanno mammeta nun ce sta

A guardarte sempe accussí,
è na cosa ca nun mme va:
quacche ghiuorno, famme saglí
quanno mámmeta nun ce sta!

Io nun pòzzo arrivá a capí
che carattere tiene tu:
Mo te trovo a chicchirichí...
mo te trovo a cucchericù...

Quanno vaco pe' te parlá,
sempe 'a vocca mm'aggi''a appilá...
Ma putimmo,
ma putimmo tirá accussí?

"Vene mámmema: lête 'a ccá...
ce sta frátemo: nun guardá..."
A chi santo,
a chi santo vuó' fá ammalí!?

II

Pe' st'ammore ca sento oje né'
nu rialo te voglio fá:
Si ll'acciette voglio vedé
che ne dice mammá e papá...

E vulesse pur'io tené
nu ricordo, pe' mm''astipá...
Sissignore, che male nc'è?
Nu regalo tu mm''o puó dá...

Tu mme daje na cosa a me,
io te dóngo na cosa a te...
e ll'ammore,
e ll'ammore accussí se fa...

Che nce passa tra me e te,
manco 'a gatta ll'ha da sapé...
Acqua 'mmocca,
acqua 'mmocca e lass''e pparlá...

III

Quanno fráteto 'appurarrá,
accummencia: Chiacchiá...chiucchiù...
Ma 'o rialo po' va a guardá...
se 'mbriaca...e nun parla cchiù!

Accummencia, pe' se 'nquartá,
pure páteto ca nun vò'...
Saglie mámmeta p'appurá
e pur'essa fa nu to-tò...

Po' se guardano tutt'e tre
e s'avotano 'nfacci'a te:
"Quann'è chesto,
quann'è chesto...sagliesse ccá..."

Tu rispunne: "Se sape, embè...
stu rialo v''o fa pecché...
pecché chillo,
pecché chillo...sagliuto è giá!"

Capurro - Gambardella