Letra Caino e abele Davide Van De Sfroos

Caino e abele

Abele l'era bònn, Caino mea taant,
a l'era in sö la Bibbia, ma l'era mea un Saant
i eren düü fredèj, ma i eren l'uppòst,
diversi del tütt, cumè i pastigli e i süppòst
Abele l'era bell, cumè un atuur francees,
Caino l'era brött, che s'cepàva i cineprees,
Abele l'era voolt e anca ben piazzàa
Caino l'era göbb e sempru incazzàa

Sèmm al muund in düü e vöen me sta söi bàll,
dumà a vardàll in fàcia me vee vöeja de cupàll
l'è grand e gròss, ma appèna l'è de spàll
ghe foo vedé me cume l'è bèla la mia vàll!

Abele cantava le lodi al Signuur
cun la vuus meludiusa che el parèva un tenuur,
Caino, stunàa el ghe pruvàva per uur,
el pàreva un purcèll scüsciàa de un tratùur

Perfino il buon Dio un dè l'ha ciamàa,
l'ha stupàa i urècc e pö dopu el g'ha parlaa
Caro Caino, se te voret pregà,
sun pròpi cuntèent ma desmètela de cantà,
altrimenti i me angeli me perden i piöemm
e tücc i pèss i me nèghen in del fiöemm

Abele l'era in furma e vegetariàn,
mangiàva un zìcch de üga e un tuchetènn de pàn
e dopu una giurnàda passàda a lavurà
el gh'era ammò la forza de cantà e de balà

Caino el cùpava tütt quèll che se muvèva,
el majàva cumè un lùff e vacca se'l bevèva
e dopu una girnàda passàda ciùcch desfàa,
se tràva in söel praa e pö el tacàva a runfà

Per passà un zicch el teemp, i giügàven al balòn,
Abele l'era bràvu e quell'oltru un scarpòn,
Abele palleggiava che 'l pareva el Ronaldo,
Caino el parèva el fredèll del Braccobaldo

El praa dell'Abele l'era graand cumè el Meazza,
nel praa del Caino ghe stava gnaa una tàzza
nel praa dell'Abele gh'eren tücc i piaant in rìga,
nel praa del Caino gh'era là dumà un'urtiga,
Nel praa dell'Abele pasculàva el bestiàmm,
nel praa del Caino pascullàven i pantegànn

Una sira el Caino el veed che rüva l'Abele
Incazzàa cume el soo mea cussè che ghe s'è ruta la tele
Caino che el g'ha mea la televisiòn
el diis che al limite ghe ròla sö un canòn
Abele a bùca vèrta e scandalizzàa
el ghe diis Che vergogna, te seet anca un drugàa!
Vergogna de chii, che sèmm che dumà in düü

Quell'oltru ridendo el g'ha respundüü

La Bibbia la diis, che g'ho de fàtt la pèll,
però me g'ho un sistèma che l'è ammò püsse bèll,
tiri sö i me stràsc e voo via me
te làssi che a giügà a tennis de par te,
te làssi che a giügà a tennis de par te !