Letra Diego paz wohr nüngzehn Bap

Diego paz wohr nüngzehn

Basil Biggs, dä Leuchtturmwärter, daach:
"Wat zum Deuvel läuf do drusse enn der Naach?"
'82, noch woor't enn Port Stanley still,
lang eh die Sonn opjing, enn der Naach zum eezt'April.
Diego Paz wohr sick 'nem Johr enn der Armee,
General Galtieri selvs hatt die Idee,
Wie mer vun 'nem Bankrott optimal afflenk
un enn einem kloorstellt, wo dä Hammer hängk:
"Övver Naach, em Handstreich, durch en Invasion
weeden die Malvine heimjehollt, un schon
Stonn se widder hinger mir, brav bei der Stang."
Basil Biggs sooch Landungsboote, jrau un lang.

Diego Paz wohr nüngzehn, sick 'nem Johr enn der Armee,
Uss Rio Gallegos, jar nit wigg vun he.
Unge 'm Hafen hatt sing Mamm sujet wie en Imbissbuud,
Ohne Vatter opjewaaße, dä wohr ald sick '64 duut.

Billy Johns schleef öm die Zick enn Liverpool
op der "Sheffield", friedlich, noch wohr alles cool.
Doch wat e' enn dä Hängematt nit hühre kunnt:
Ahm andre Engk der Welt dä Gong zur letzte Rund.
Enn 'nem Leuchtturm enn Port Stanley wood et eng,
mer sooch Basil, dä Diego Kaffee enschenk.
Dä sooß met aach andre durchjefroore do,
un dä Leuchtturmwärter daach: "Da'ss all nit wohr!"
Jäje zehn dann schon die Kapitulation,
ohne Opfer, selden bei 'ner Invasion.
Doch für Maggie T. enn London stundt ald fess,
dat et Empire sich su nit verjaare lööß.

Diego Paz wohr nüngzehn, sick 'nem Johr enn der Armee,
Uss Rio Gallegos, jar nit wigg vun he.
Unge 'm Hafen hatt sing Mamm sujet wie en Imbissbuud,
Ohne Vatter opjewaaße, dä wohr ald sick '64 duut.

'ne Mohnd spääder 'm Morjenjraun wohr't Empire do.
Bombe op Port Stanley, Maggie T. maat wohr,
Wat se ahnjedroht, Goose Green versank em Bloot,
un vun Diego hätt mer nie mieh jet jehoot.
Billy Johns ess, eh die "Sheffield" dann versank,
hinger 'nem Jeschütz elendig verbrannt.
General Galtieri blevv nur noch e' Johr,
bess sing Junta endjüldig jescheitert wohr.
Die Tarnfärv vun dä Wracks ahm Arsch der Welt
bläddert, Ross friss, doch et jitt kei Jeld,
Dat 'ner ahle Frau et einz'je widderjööv,
wofür se vun '64 bess Goose Green jelääv.

Diego Paz wohr nüngzehn, sick 'nem Johr enn der Armee,
Uss Rio Gallegos, jar nit wigg vun he.
Unge 'm Hafen hatt sing Mamm sujet wie en Imbissbuud,
Ohne Vatter opjewaaße, dä wohr ald sick '64 duut.